امبارح كنت في فرح واحد قريبي وانا بقالي فترة من عشر سنين كدا مبحضرش افراح عادية تقريباً كلها كانت افراح اسلامية المهم كنت رايح والجو كان فظيع بس قلت الواحد ياخدها بنية صلة رحم ودي كانت شوية ملاحظات وخواطر قعد افكر فيها وانا قاعد في الفرح
ء مستوى الاغاني اللي بتشغل في الفرح انا زمان كنت باسمع في الافراح اللي زي دي اغاني وحشة اه بس مستواها احسن من كدا بمليون مرة الحاجة اللي اتضايق اكتر تفاعل الناس معاها بصورة غريبة
ء مش ممكن الاختلاط اللي بيحصل في الفرح بالصورة دي وخصوصا اصحاب العريس انا مش فاهم ازاي العريس بيقبل ان كل العدد دا من اصحابه يبصوا على زوجته خصوصا بقى وهيا فاكره نفسها قاعدا في بيتهم ولا حجاب ولا حشمة ولا اي حاجة
ء الناس اللي بيسموا نفسهم دي جي واللي بيبقوا في الفرح وهما اللي بيشغلوا الاغاني الهابطة دي سنهم كان واضح انه صغير حدود ال 18 سنة او اقل ومشكلتهم ان هما اللي بيفرضوا الاغاني على الناس دا غير كدا انهما بيبقوا من بيئة متدنية جدا وميعرفوش حاجة اصلا اسمها ذوق فاكيد الاغاني اللي هتشتغل هتبقى حاجة في الضياع
ء حاجة اول مرة اخد بالي منها ان الاناشيد الاسلامية هيا الوحيدة اللي بتتكلم في مناسبات زي دي كمان بيبقى فيه اصدرات مخصصة للافراح مش اغنية في شريط وخلاص لأ دا بيبقى شريط مخصوص عشان المناسبة دي ودي نقطة تفوق لينا طبعا بس في نفس الوقت نقطة ضعف لأننا مش بننشر الاناشيد دي وسط الناس وكأنها مينفعش تتغني غير في فرح اسلامي
ء غير كدا الفرق الاسلامية والفرق بينها وبين الفرق التانية الواح فعلا بيبقى قاعد في الفرح مبسوط جدا من الاناشيد والاسكتشات والحوارت اللي مع العريس دا غير كدا الناس بتبقى قاعدا مرتاحة مش حاسة ان هيا بتعمل حاجة حرام
ء تقريبا كل الحضور كانوا محجبات ولأول مرة في حياتي اشوف اخلاق محجبات بالمنظر دا رقص ومسخرة وايه دا كبار وصغيرين
ء النادي اللي كان فيه الفرح في تقريبا خمس قاعات افراح كمان والحمد لله كلهم كانوا بالنمظر دا واسواء
ء كمان يعني اتنين بيجوزو وفرحهم بالشكل دا ان شاء الله عيالهم هيطلعوا ازاي
ء اكتر حاجة استفزتني ان الواد بتاع الدي جي اول لما العروسين دخلوا القاعة راح مشغلهم اغنية كدا هادية قال ايه عشان يرقصوا عليها فانا قلت يعني العروسة من السيدة والعريس من دار السلام فأكيد مش هيوافقوا او هيتكسفوا لكن المصيبة ان هما صدقوا نفسهم و.....وبس
دي كانت ملاحظات خد بالي منها في ربع ساعة بس لغاية لما العريس اللي هوا ابني عمي الوحيد جه فقمت سلمت عليه وفكيت من القاعة ورحت ماشي
مش عارف لو كنت قعد اكتر من الربع ساعة دي كان ايه اللي حصل ولا ايه اللي كان اكتب بس الحمد لله ربنا ستر
اخيرا الكلام ممكن يكون عادي لناس وهوا بالنسبة لي كدا بس اكيد الحاجات دي بتحزن الواحد اوي وهوا بيبص على حال الاجيال اللي جاية وتحسسينا بالتقصير اوي تجاه اقرب الناس لينا يعني لو الواحد كان قعد مع العريس قبل الفرح وساعده في الاعداد للفرح وقاله كلمتين مش كان ممكن الفرح يكون حاله غير كدا والواحد كان قعد لغاية البوفيه
احبكم في الله
